Romans 4

Besisi N Ibrahim Yi

1– 2Dna n nayi Ibrahim nu zhin eyi a Yahu-diyi dada. Ko ɓei wo n wuna dna nɓenya yemiʼa, gaiciya ga n gni-gni yiʼa? Ntu nwo atnu-tnu manayi ɓo nu n Shekwoyi ɓei gwo wo? Ngye lonu nu, yi n nyai lo n yi ɓa gma. Ama n Shekwoyi aba Ibrahim to n na abayi lo n wo ɓa gma kwo wa zhin aɓekwo n. 3Ntuge, Littafi ku gna yi ge Ibrahim ɓei ga Shekwoyi gaiciya, ntuce nu Shekwoyi wa zo wo alaifi wa yi wo oza gyi-gyi-yi.

4– 5Ama wo to ɓei lo eshe ntu n wa aɓo amanayi ɓo nu n wo ɓei zhin nyin? Awo, gni-gni zhin Shekwoyi cauta nu. Aga aza nu n ɓa to zhin tnu-tnu n tu nkwo ɓo n. Ntuge Shekwoyi ze alaifi da a gyi-gyi-yi n wo awyeba, ɓai ya ga Kristi gaiciya, wa gni ɓa n Shekwoyi minagyi.

6Dawuda Esuɓei ku oza agmada ɓeda wato laifida n Shekwoyi la wo ze oza gyi-gyi-yi ntna laifi nwo abye. 7Anabarka da nu oza n Shekwoyi ku gafara zhin wo, wo la oza laifi kuya n wo awye ba. 8E, agmada yakwo nu n za aba n na aku abui zowo, to Dagayi shan wo alaifi ba m.

9Nsaiye ɓonya nyi ge; aga aza nu anabarka n ɓa ga Kristi gaiciya ɓai shi a Yahudiyi awyidna bwa, ko aga aza nu anabarka n ɓata shi a Yahudiyi awyi-dna bwan, amma ɓai kpe ma Kristi a? Ibrahim ma, n ya gna ge wo ɓei gwo anabarka ntu wo gaiciya gaɓonu. Gaiciya ga nu gmanyi? Ko ntu ge wo ɓei shi a Yahudiyi awyidna bwa nuʼa?

10Ntu ge aga ɓonya deye amsa, sai a ga deye amsa kpa. Shekwoyi ɓei ga Ibrahim owo anabarka n kni sayiʼa? Tun kafin wo ze Yahudiyi, kalm wo zhin kaciya.

11Nna avun nu n Shekwoyi ɓei zhin wo alkawali ntu n wo gaiciya ga ɓo, a zhin wo kaciya. Kaciya zhin ɓei wuge Ibrahim n gaiciya ga yi lo, njesun ge Shekwoyi ɓei lawo lu gwo wa zewo tna-laifi da, oza manayi nwo awyeba kafin a zhin wo kaciya. Ntu lo nu Ibrahim nu zhin dada, zafun nya, n aza aba nɓa ku gaiciya ga, ai la ɓa gni to ɓai shi Yahudiyi awyidna bwan. Yi ku gye nu aza nɓa ta shi awyidna bwan, Shekwoyi nu gniɓa ntu ɓa gaiciya ɓo. 12Ibrahim nu zhin a Yahudiyi dada dna n zafun n na ku kaciya zhin ɓa. Ɓa ɓa gye n wo ɓesisi nge kaciya zhin nu tagni ɓa m, ntu ge Ibrahim ɓei bwa Shekwoyi alheri ntu wo gaiciya ga ɓonu gmanyi, kafin azhin wo kaciya.

13Kwa wunu cewo ngye Shekwoyi alkawali, nwo ɓei zhin Ibrahim nwo byei nyi, nge wo ɓa gawo anyi vinya nyi. Woto ɓei zhin wo alkawali ye ntu ge wo ɓei shi Shekwoyi awyidna bwa nun, ama ntuge wo ɓei ga wo gaiciya. 14Ntuce nu n dei hoye gnalo ge Shekwoyi anabarka lo aza banu n ɓa zhin ɓemana, ho gna nu ge, Shekwoyi alkawali n na a gaiciya gayi aba kwo zhin gbeloyi nu, gaiciya ga n la ze nyaze. 15Ama gaiciya ɓeda ye nya nu nyi. Sa nu n ya zhin atna ge ya bwa Shekwoyi anabarka n gni-gni yi, n na ɓemanayi zhin ɓo, n wo awyidna bwa shi yi, yi zhin ya zo fi n wo minagyi nu, ntuge ci-ci yi ta mi nɓa bwa shin. Zokwo gmanyi n yi ɓa fa awyidna bmaya ɓo, yito bwa wyidna kwo gmanyin.

16Ntu lonu, agayi Shekwoyi anabarka ntu gaiciya ga ɓo nu. Cauta nu yi ɓa gwo kwo to yi ya vi a Yahudiyi kunun, n yi n gaiciya gayi lo ngye Ibrahim. Ntuge Ibrahim nu zhin yi dada sa n kwa ɓe gaiciya ga aba. 17Nya nu n littafi a da, sa n kwo ciyi ge Shekwoyi ɓei la Ibrahim ze oda aza begye nya. Shekwoyi ɓa gwo aza vinya n ɓa ga Shekwoyi gaiciya shi Ibrahim ɓei zhin nyi. Alkawali deye gmi n Shekwoyi aba nu, n wo zhin a zafi ɓai bwa wye-wyeyi n jesun nyi, woi da aɓo ɓo n ɓa ɓei zhin n abye n gyeɓaku luzhin. 18Ntu lo nu, sa n Shekwoyi ɓei gna Ibrahim nge, wo ɓa gawo ɓi n wo ɓa bwa ebye gawo n mwa, waze ebye yakwo, Ibrahim ʼbei la Shekwoyi ga gaciya ko shi ko nyi kwo ɓei zhin ɓo ɓedna yi nu. 19Ntuge, owo gaiciya ga ɓei n kalayi, wo to ɓei damu ge wola kwo n, nna ɓa yi wo ge oda nyin. Woi aye yi tagyi, Saratu owo nyikwo aye ce Shi-ciwa-gmanyi, wo ɓei la du aɓima saya.

20Ama Ibrahim to ɓei zhin Shekwoyi shakan, wa ga Shekwoyi gaiciya ntuge, owo gaiciya ga nwo awyetu yi ɓei n kalayi. Wa ci Shekwoyi ntu anabarka ye ɓo, to woi lu ɓa bwan. 21Wo ɓei n gaiciyai ga ge Shekwoyi ɓa mi wa nu ɓo n wa da. 22Ntu Ibrahim gaiciya ga ɓo, Shekwoyi wa zhin wo alaifi gafara, wa ze oza ntna laifi.

23Nsaiye, ɓeda wo-wo yi ye nge aɓei gwo wo ntu nwo gaiciya ga ɓo nu, ko to ɓei zhin ntu Ibrahim gyi ba ɓo nu gmanyin. 24Kwo zhin eyi nyanu, kwo wuyi ge Shekwoyi ɓa gwo yi n zokwo gmanyi, shi wo ɓei gwo Ibrahim nyi–sanu n ya ga Shekwoyi alkawali gaiciya, n wo ɓei la Yesu eyi Dagayi kala n efi nyi. 25Wo ɓei fi ntu yi alaifi ɓo wa laka n vingwo ntu ge wa ze yi aza ye-ye yi n Shekwoyi aba. Woi nu yi n Shekwoyi ɓe manayi.